FARRAWN KHUA CHUH KEH NAK
Pathian dawtnak le lamhruainak thawng in Farrawn khua kum 150 tlinnak puai cu April ni (15) zan in 16-17 ni tiang tlamtling te in kan tuah i a tanglei bantukin kan tuah ning caan hman ning cu a si.
2. 15/ 4/ 05 ( Khual tlun zaan )
Pathian biaknak in caan kan hman. Hla hruaitu Pu Lian Kung, chairman Pastor Amos an si. Pu Uk Nawl thlacam nak in kan pumhnak cu 8:00 p.m ah kan thok. Solo Pu Chum Vung. thawngthanhtu Pu Sang Hmung le Pu za Tlung. Hlaremh saknak BARS Sianhngakchia an si. Biatawi chimnak cu Pu Rual Cung caan kan pek.
" Kum 150 a tling cang mi Farrawn tuanbia kan zoh than tik ah kum 130 hrawng cu tluangte in a kal ko nain kum 20 chung hrawng cu a phun a dang deuh. Kan pupa hna nun zia dawh a tlau ciah mah cang. Farrawn khua a lam kip in a thancho nak ding caah Dinfelnak le lungrualnak in kan dihlak in tuan than ding le Zisuh Kri sawm ding " in bia a kan cah!
Biatawi chim ( 2 ) nak - Pu Ram Kian
" Khual leng um Farrawn laitlai unau nih khua caah dawtnak an ngeih bantukin laihlum zong nih nei ve seh law, khua le ram ca-ah dinfelnak le teimaknak thinlung he lung rual te in kan tuan ti hna lai. Tuan deuh chan ah kan rak hman ti lo mi rithainak le zukhmawm mi nih khua le ram a rawk sual lai caah Pathian sawm in maak khawh ding ah kan sawm hna. " ti in bia a kan cah.
Zapi ca thlacam - Pu Ca Lian Thang
Phungchimtu - Pu Chan Cung
" Kan nunnak ah zei thil kan tuah mi paoh hi tuanbia an si dih i, kan mah tuanbia kan i tial a si ko. Mary nih Bawipa Zisuh zihmui a toih mi zong hi tuanbia tha ah a cang. Khua le ram ca-ah tuanbia tha tial ding ah dinfelnak he lungrual te in tuan cio hna u sih " tiah thawngtha le forhnak bia a kan chimh.
3. 16/ 4/ 05 ( Zarh -te zing )
09:00 AM : Lungphun onnak
Kum 150 tlinnak lungphun onnak in caan kan hmang hna. Hi caan ah khual lei in a tlung kho mi 1217 le khuachung ummi kan dihlak 2000 reng lo cu tual ah kan chuak dih. Cu tual cun lungphun honnak puai tuah ding in Baptist Biakinn tual lei ah Motor cycle (7) le motor (6) nih lam an kan hruai i kan dih lak in kan kal hna. Lungphun cu minung 150 reng lo nih February thla ah an put mi 9' x 5' x 6" a lian mi lung a si.
4. Lungphun honnak caan hman ning
Caan tlaitu: Pu Za Tlung
09:22 AM ah " A hme ram Laitlang " ti mi hla kan sa. Pumh onnak ribbon kha Pu Van Lian le Pu Than Hleng nih an tan i, Rev. Than Sai nih remote control in lungphun honnak 09:25 AM ah a tuah hnu ah motor le motor cycle nih horn an tum. Meithal an puah. Darkhing an tum.
5. Kum 150 tlinnak puai caanhmannak (10:37 AM - 12:35)
Caan tlaitu - Pu Sang Hmung
A hmasa bik ah Pu Sang Hmung nih Farrawn khua kum 150 tlinnak puai pumhnak kan thok cang tiah a thanh. Cu hnu ah khua tlatu hna le liam cia pi le pu hna upat peknak bia Pu Van Thang nih a tang lei bantuk in a rel.
a) Sa le ral a phunphun lak ah lungrual te in Farrawn khua a tlatu liamcia kan pi le kan pu le hna:-
b) Zawtnak a phunphun, tem-in nak a phunphun tuar bu zong ah lung dong lo te in Farrawn khua a dirkamh tu liamcia kan pi kan pu hna....
c) Serhsatnak a phunphun, nihsawh thlanglamhnak a phunphun le taam-halnak a phunphun tuar in taimaknak he Pathian a rak i tlaihtu Krifa hmasa liamcia pi le pu hna.....
d) Farrawn khua thanchonak ah siseh, a hrinhno i a nuamh khawhnak hnga caah siseh, fimnak thiamnak he Pathian a rak i tlaih tu Krifa hmasa liamcia pi le pu, nu le pa vialte hna....
Dinfelnak, toidornak, dawtnak, teimaknak le lungrualnak he nan tan ti caah khuazung ah Farrawn khua thangchia mualpho lo te in kum 150 tiang khua kan sak khawhnak asi ti thei hngal bu in Farrawn laitlai dih lak nih lungthin tak te in upat nak kan in pek hna.
Nan ke neh zul in dinfelnak le teimaknak he lungrual te in kan tangti lai tiah bia kan i kam...Amen...
Cu hnu ah centenary chairman Pu Ngun Hram nih biachimnak a ngeih.
" Khua zei kan um paoh ah kan chuahkehnak Farrawn min kan put cio ko hna caah zei kan tuah nak kip ah kan khua mim chiat tertu si loin minthatnak a phurtu kan si khawh cio nak hnga i zuam cio hna u sih. Farrawn nih zei dah ka caah a thathnem lai ti si loin Farrawn caah zeidah kan thathnem khawh ve lai ti tu i zuam hna usih."
Pu Tial Ling nih amah phuah mi " Farrawn khuadawh " ti mi a sak. Cu hnu ah Pu Ca Lian Thang nih Farrawn khua tuanbia a tawi nak in a kan chimh.
Cu hnu ah Pu Chan Lin nih biacahnak a kan ngeih. " Kan khua le kan ram hi thlai phuntling cinnak in thancho ti ding " ah forhnak bia a chim.
Cu hnu ah Tial Hluan pa nih biatawi chimnak a ngeih, " Miphun dawtnak nih peng le tlang thanchonak lam a sial. Dinfelnak tel lo in than chonak a um khawh lo caah kan Pathian hi ding le fel te in bia hna usih " tiah bia a kan cah.
Ramleng um fa nau hna ai awh in U.S um Pu Roland nih lunglawmhnak bia a kan cah mi Pu Thang Hlun nih a rel. 16/ 4/ 05 ni 8:00 AM phone;
" Farrawn khua kum 150 tlinnak centenary puai tuahnak ah a tawl reltu le ai tel kho mi nan dih lak cung ah lomhnak tampi ka ngei. Caantha a kan ser piaktu Pathian sin zong ah lunglomhnak ka chim. Ai tel kho mi nan dihlak nan kut kan tlaih hna. A kan bawm chantu ramchung ramleng nan dih lak cung ah kai lawm. Kha hlan ah zei tluk hmanh in thangchiat mui hrutnak le palhnak rak um ko hmanh seh ngaihthiamnak le dawtnak thinlung he hmailei ah ramchung ram leng kan dihlak kan tangti hna lai. Chiatnak in thatnak lei ah kan i thleng hna lai. Pathian nih a kan khinh mi rian cu kan dih lak ca i thil tha tuah kha a si." Cu thiltha tuah kha pumpak cio in kan i zuam lai. Hmailei ah riantuan awk zong tampi a um rih. Buaibainak soiselnak um lo te in hmunkhat te ah kan caih ti hna lai. Townhall saknak ah siseh, Timerh tuahnak ah siseh, kan i zuam than hna lai. A donghnak ah cah kan duh mi hna cu kan khua thanchonak lawng si lo in khua chingchan thanchonnak tiang kan i bawm hna lai. kan ruat hna lai. A lang in thla kan rak in cam piak hna lai.
Dam te in - Roland
Cu hnu ah laksawng peknak in caan kan hman.
1. Kum ( 80 ) in a cunglei a kan nunpi rih mi Pi-tar Pu -tar ( 34 ) laksawng peknak.
2. Farrawn khua min a that tertu hna Ro-ca peknak.
3. Farrawn khua thanchonak caah rian a kan tuan piaktu hna.
4. Man pek lo in sianginn ah ca a rak chim tu hna.
5. Farrawn khua caah zaanghlei cawi i ai zuam mi hna.
6. Khual leng minung Solfa a kan chimh piak tu hna.
7. Ti-rawl lei in khua pi a kil kamh piak tu le zawtfah thop bul tu hna.
8. Khua caah temtuarnak a ing mi hna.
9. Farrawn khua in peng chung ah uknak lei upa a kan tuan piak tu hna.
10. Kum 150 tlinnak philhlonak ah Hrang Mang Foundation caah tang-ka a tho mi hna.
Khuamin Ai awh petu A zat
1. Yangon Pi Far Cin 350000
2. Kalemyo Pi Sui Khin 267100
3. Hakha Khin Mg Win 563700
4. Thantlang Pi Tial Nawn 800000
5. Farrawn Pu Lian Thawng 266100
6. Ramdang in Rev. Chan Cung 2800000
A dih lak 5146900
6. Tar ai awh biachimnak : Pu Chum Vung
Farrawn khua a rak tlatu kan Bawi le hi khua dang bawi he i lo lo in dawtnak an rak ngei i, mi zei paoh hi u nau zoh in an rak zoh hna caah khua chung ah rual remnak a rak um bantuk in a tu zong ah Farrawng laitlai paoh u nau rual zoh in van i zoh ding ah bia a kan cah.
Cu hnu ah khua bawi Pu Hmun Sang nih lunglomhnak bia a chim. Kan dihlak kan dir i a tang lei Slogan hi kan au pi hnu ah kum 150 tlinnak zapi pumhnak cu kan dih ter.
( Farrawn khua // ) ................. ( Hmun ko seh // )
( Farrawn khua // ) ................. ( Thang chin seh // )
( Farrawn khua // ) ................. ( Daihnak um seh // )
Farrawn caah .................. (Kan tang ti lai // )
Caan tlawm pal kan i dinh hnu ah lente celhnak in caan kan hmang than hna. Caan nih a kan zat lo caah zei dang lente celhnak kan tuah manh ti loh. Pumpalulh chuihnak lawng kan tuah.
7. 16/ 4/ 05 ( Zarhte zaan )
Zarh te zaan zong hi kum 150 tlin pumhnak hmun ah caan kan hmang than. 19:50 ah Rev. Van Lal Uk nih hram thoknak thla a cam. Laam a phunphun, hlasaknak le capo nun nuam chimnak in caan kanhman hnu ah kan siang lo ngai na in 23:30 ah Rev. Than Hniin thla camnak in kan caan kan dih ter.
8. 17/ 4/ 05 ( Zarhpi ni )
Farrawn Baptist biakinn ah Pathian biaktinak le Farrawn khua caah thluachuah hal piaknak in caan kan hman.
Pianist - Stanly Hla hruai : Pu Van Thang
Chairman Rev. Van Lal Uk. Johan 2 : 6 - 10 a rel hnu ah Pastor Biak Hlun nih hramthoknak thla a cam.
Cu hnu ah Antony Ngun Uk nih bia tawi a chim.
" Farrawn ka Krifa hawi sin ah bia chimnak caan ka hmuh caah ka lung ai lawm. Pathian nan tihzah ruang ah chan saunak an pek hna i, minung ( 34 ) nih kum 80 renglo laksawng nan lak khawh . Nan tlangtaar bantuk in dinfelnak ngeih van i zuam chin ko u."
Bia tawi chimnak - Rev. Thang Bik. " Jerusalem hlun khan Jerusalem thar hmuh awk ah cun kan hlawn kha thlak a hau. Kan hlawn kha kan phuak ve lo ah cun kan tlangtaar hi a lak a si sual lai, cu caah dinfelnak he kan taar khawh nak ding caah a kan dawn tu kan hlawn kha thla cio u seh law, Zisuh Kri hlawn kha i hruk cio usih."
Group Song - Pu Lian Kung, Pu Hrang Zel, Pi Siang Tang, Sym Biak Hnem, Pu Sang Chawn
Biatawi chimnak ........ Pu Lal Kung
Farrawn khua tlatu Pu Lian Tem a fa ah Pu Al Dun, Pu Al Dun fa ah keimah ka si caah kum khua cun upa si lo hmanh ah chan kal ning in Farrawn ah upa cem ka si. Khua tuanbia zoh tik ah uktu hna nawl ngaihnak ruang in thanchonak tampi an hmuh. Cu ve bantukin a tu chan mi zong nih uktu nawl ngai hna usih law dinfelnak he lungrual te in tuan hna uh sih.
Phung chim ......... Rev. Tin Aung Shwe
Farrawn khua cu kum 150 a tling cang i, Pathian an theihnak kum ( 80 ) a tling cang. Kum zeizat dah na si cang ti nak cun kum zeizat dah Pathian he nan kal ti cang ti hi a sung deuh mi biahalnak asi. Kum zeizat kan si hmanh ah Pathian he kan um ti lo ahcun san tlaihnak a um loh. Pathian he umtinak ding ah a tuan a tlai ti a um loh. Ni hin ni hin Pathian he umti hna usih law. Zeizong vialte hi tlam a tling ko lai tiah forhnak bia a kan chimh.
Thawngtha chimtu thluachuah peknak in 13:04 ah pumhnak kan dih ter. Zaanlei 4:00 PM - 6:00 PM tiang khual he lai he kan dihlak cu tual ah centenary rawl dumtinak kan ngei. Kikong ( 2 ) le vok sum ( 6 ) pa (2 ) kan thah.
9. 17/ 4/ 05 ( Zarhpi zaan )
Pathian thangthatnak in caan kan hmang than.
Pianist - Stanly Hla hruai - Pastor Van Hngak Thang
Chairman Pu Za Tlung nih Bible a rel hnuah Pastor Beauty thlacamnak in pumh kan thok. Main komiti chairman Pu Ngun Hram nih kan puai tuahnak cung ah a ken kip in a kan bawm tu dihlak cung ah lunglomhnak bia tlamtling te in a chim.
Solo - Van Hnuai Thang Biachimnak - Pu Phun Er
Khual a tlung mi dihlak cung ah lunglomhnak bia khua mi ai awh in a chim,
Group Song - BARS
Biatawi chimnak
Pu Joshua " Pathian nih Abraham kum (75) a si hnu ah a kamh mi a tlam a tlin bantukin Farrawn khua zong ah a tlam tlin ve nak hnga Kri lung put he kan tlangtaar hi kal pi usih law Pathian nih thlua kan chuah hram ko seh."
Thawhlawm kholhnak ah thla a camtu
Pastor-Ca HnemPhungchim - Rev. Dr. Ca Hngak Chanrelnak 7:14, Rom. 11:26, Efisa 2:19, Salm 56:8
A cung lei Bible ca caang hna a chim dih hnu ah Salm 37:34 i Bawipa nawl nan zulh i a duhnak nan zulh ah cun nan ram a dam lai. Farrawn khua ah tuanbia thar kan tial bantukin kan tlangtaar ning in dinfelnak he kan tuan ah cun kan ram a dam lai i, kan ram a dam ah cun Jerusalem thar kan phan than ko lai tiah can sau pi chung tlamtling te in a kan chimh.
Donghnak thlacam - Pu Bil Ling
Phungchimtu thluachuah peknak in 10:10 p.m ah pumhnak kan dih ter.
10. Biadonghnak
Farrawn khua kum ( 150 ) tlinnak puai pi cu kan sian lo ngai bu in dih ko hmanh seh law kan chan chung philh khawh asi bal ti lai loh. Khual lei i a hong tlung mi hna don hmun ah kan tlangtaar ai tial mi " Kan pupa hna bantukin dinfelnak le teimaknak thinlung he lungrual te in kan tangti lai " ti cu hawk cang hmanh hna sehlaw kan lungphun ah chan ciam lo in a um peng bantukin pumpak kan thinlung cio ah um cam cin ko seh.
Record tialtu : Pu Val Lal Hngak
Pu Van Khar
Pu Ngun Hram Pu Sang Hmung
Chairman Secretary
Farrawn khua kum 150 tlinnak puai tuah tu Komiti
